علی ی واری بواش و وچه تربیت هکن
کربلائی کربلاجا چی شی سوغات ورنی
از امام حسین چه سوغاتی به همرات ورنی
هیچّی دونّی کجه بوردی کنه پلی بوردی؟
شیش امامِ قبرِ سر چه برمه گلی بوردی؟
تو که بوردی در نجف بوردی تماشا هکنی؟
یا که بوردی شِه خدّه عرضه به آقا هکنی؟
اگه بوردی تماشا من حرفی ندارمه ته جا
اگر عرضه اسّه بوردی نگران نواش مه جا
اجازه هده بپرسم چی شی بوتی علی ره
چی شی بوتی آسّوک آسّوک تو خدای ولی ره
علی مظهر عدالت بیه دونّی یعنی چه؟
طالب فیض شهادت بیه دونّی یعنی چه؟
علی معنای سخاوت بیه دونّی یعنی چه؟
با گذشت وبا کرامت بیه دونّی یعنی چه؟
علی وشنا بیه تا وشناهاره سر هکنه
راضی نیّه وقت خوبی هکردن دِر هکنه
علی یتیم وفقیرون پر وبرار بیه
شه نداشته ولیکن همه یسّه اعتبار بیه
من وتو چنّه علی ی واری هسّمی تو بَوْ
چی ره دوست دارمی وچی ره دل دوسّمی توبَوْ
اِما مِرغ بِریونّه شه نوش جان کمّی ولی
پیش بمونسّه پلا الّمی فقیر پلی
زیارت معنی اش اینه که علی ره بمونّیم
نا اینکه همین جوری شه خدّه شیعه بدونّیم
معنی زیارت هکردنّه یاد بهیر برار
سعی هکن ته کارو کارا همه بوئه علی وار
علی ی واری بواش و وچه تربیت هکن
چه وچونی؟ زینب وکلثوم و حسین وحسن
من وته کیجا کجه حیدر کیجائون کجه؟!
من وته ریکا کجه حیدر ریکائون کجه ؟!
چنّه اِما علی ره مومّی ؟ بمونِیم علی ره
راسّی ثابت هکنیم اگر دوس دارمی ولی ره
اگه مرتضا را دوس دارمی دراغ چیسّه گمی
غیبت وتهمت وحرف افتراق چیسّه گمی
اگه مرتضاره دوس دارمی چه اهل کینومی؟
چه ونسّه سرسر زمّی مگر اِما دینومی؟
اما دومّی هر کی مرتضا علی ره دوس داره
مرتضا علی همه جا ونه پر وبراره
وقتی که علی آدم پر وبرار بهووه
وقتی که علی آدم دل قرار بهووه
دیگه غم نمونّه تا آدم دیگه غم بخره
غیر خوبی نتّونّه هیچ چی شه همراه بوره
معنی محبّت علی مگر غیراز اینه
بخود علی قسم دوستی حیدر همینه
کربلا بیمومی شه خدرّه گوم نکنیم
یعنی مواظب بوئیم شه خدّه محروم نکنیم
زحمت امام حسینّه اتی در نظر داریم
سعی هکنیم ونه فداکاری ره یاد بیاریم
سعی هکنیم بعد از این تا اتّا کاری هکنیم
ونه در عمل هرسّیم وره یاری هکنیم
معنی یا لیتنی کنت معک ره بدونیم
اون وقت هنیشیم زیارت عاشورا بخونّیم
محسنی ته حرفای دله اگر دووه عمل
مطمئن باش هر چی که بوتی همه نیشته به دل
