دلگویه مازندرانی (چتی تومّه یاد بکنم)
کربلاره چتی تومّه یادبکنم
ته بلاره چتی تومّه یاد بکنم
روز عاشورا ره مره یاد نشونه
من ته ناله هاره چتی یادبکنم
دسّ وپا زوئی تو قتلگاه دله
من ته ناله هاره چتی یادبکنم
علی اکبره تن بیّه رزو رمون
من شه برارزاره چتی یاد بکنم
ته علی اصغره گلی تیر بخرده
شیشماهه ریکاره چتی یاد بکنم
ته علمدار دس وقتی بیّه جدا
من ونه وفاره چتی یاد بکنم
من تلّ بالاو تو میون گودال
شمر بی حیاره چتی یاد بکنم
ته سرره بورینه ولی از پکفا
ته صبر ورضاره چتی یاد بکنم
ته تن ره بدیمه پاره پاره بیه
سر بیه جداره چتی یاد بکنم
آخرین لحظۀ قتلگاه بووِم
داغ ته کیجاره چتی یاد بکنم
مره بوِردنه بعد تو اسیری
من شام بلاره چتی یاد بکنم
اما درشهر شام بیمی تماشائی
اونهمه جفاره چتی یادبکنم
مجلس یزید نا محرمون دله
اون طشت طلاره چتی یاد بکنم
ته وچون اشانه یزید بی حیا
زوئه ته لباره چتی یاد بکنم
ته کیجاره دشمن بخواسّه کنیزی
من اون صحنه هاره چتی یادبکنم
محسنی ره برار هردِه یاری کمّی
ونه برمه هاره چتی یاد بکنم
